Некогашниот шеф на верификационата мисија на ОЕБС на Косово, Вилијам Вокер, моментално е во Приштина каде разговара со лидерите на Демократскиот сојуз, пренесуваат косовските медиуми.

Вокер, кој во последните неколку години лобираше за интересите на движењето Самоопределување и е познат лобист за косовската независност, стигнал во Приштина два дена откако косовскиот претседател Хашим Тачи ги предупреди лидерите на ДСК и Самоопределување што побргу да формираат нова Влада.

Се уште не е познато дали Вокер ќе се сретне со лидерот на Самоопределување Албин Курти.

Иако изборите во Косово се одржаа пред три месеци, лидерите на партиите кои добија најмногу гласови и натаму не успеаја да постигнат договор за формирање на нова влада.