Викторија Давитковска, македонско девојче во освојување на светските модни писти
Осмоодделенката Викторија Давитковска од Скопје вели дека првите чекори во светот на фотомоделството, пред две години, ги направила сосема наивно и непланирано откако поради нејзината несекојдневна убавина ѝ било понудено да направи фотосесија за македонскиот фотограф Аварел.
Потоа тие се договориле да ги пратат фотографиите во Белград, кај манекенката Данијела Димитровска која е сопственичка на модната агенција Models Inc. Воедно Данијела како победничка на натпреварот Elite Models Look во 2004 година во Србија, има лиценца за органзирање на овие натпревари во таа држава.
– Откако ги пративме фотографиите до Данијела, за неколку дена бевме повикани во Белград на кастинг и ни беше понуден првичен договор за соработка, односно дека сакаат Викторија да биде дел од нивниот тим – вели Марија, мајката на Викторија која се грижи за нејзината кариера, со оглед дека таа е малолетна и ни открива дека фотогеничноста на девојчето го привлекла вниманието и на одговорните во матичната агенција Elite Models Look во Париз.
Но, со оглед на ковид-пандемијата која го зафати целиот свет сите нејзини планови моментално се ставени во мирување и чека некое подобро време кога ќе може да ги реализира.
Викторија моментално е осмоодделенка во едно скопско училиште и вредно учи, а средното образование планира да го продолжи во некоја од скопските гимназии. Таа го сака манекенството, но истакнува дека пред сè најважно ѝ е образованието.
– Моја желба е да успеам да ги освојам светските манекенски патеки, да станам светски позната манекенка а напоредно со тоа, да не го запоставам школувањето, бидејќи сакам да завршам високо образование – вели и ни открива дека во сето тоа има голема поддршка од родителите и поширокото семејство.
Како секоја тинејџерка и таа сака времето да го минува со другарките и другарите и спортувајќи одбојка. Но поради корона кризата сето тоа сега е во мирување па најчесто слободното време го минува гледајќи телевизиски серии.
– Најмногу ми недостига директниот контакт и дружење со моите другари бидејќи ниедна онлајн настава не може да го замени тој дел. Поради корона вирусот беа сопрени и сите мои манекенски активности, односно гледаме дека општо целиот свет е ставен на пауза. Се надевам дека наскоро светот ќе се врати во нормала и сите ќе можеме да продолжиме кон исполнување на нашите животни цели – вели Викторија.