„Вијести”: Кривокапиќ ја најави новата црногорска влада до петок
Мандатарот за состав на новата црногорска Влада, Здравко Кривокапиќ изјавил дека комплетниот состав на владата ќе биде познат до петок и оти ќе ги испочитува роковите да достави предлог за состав и експозе до парламентот на три дена до седницата, пишува црногорскиот весник „Вијести”.
Според весникот, Кривокапиќ повторил дека за министри за одбрана и за внатрешни работи има по тројца кандидати.
„Вијести” додава дека мандатарот не сакал да потврди дали лидерот на Граѓанското движење УРА, Дритан Абазовиќ сè уште е кандидат за министер за внатрешни работи, но, додава дека тој потврдил дека ќе биде потпретседател на владата.
– Неговата нова улога ќе биде да ги координира сите сектори на безбедносната структура. Постојат три дела, еден во рамките на Агенцијата за национална безбедност (АНБ), вториот во полициската управа и третиот во врска со Министерството за одбрана и военото разузнавање, рекол Кривокапиќ.