ВИДЕО | Зошто Данците ги оставаат бебињата спокојно да спијат на улица?
Дали можете да замислите ситуација во која безгрижно ја оставате количката со вашето бебе пред продавница додека пазарувате? Тоа е речиси незамисливо за нашите простори.
Но, таа практика е сосема вообичаена во Данска, каде на речиси секој чекор можете да видите оставени колички со бебиња без надзор од родителите. Меѓу другото, тоа е изводливо затоа што киднапирањата на деца се исклучително ретки во Данска.
Исто така, родителите ги опремуваат количките со монитори за бебиња и на тој начин ја следат состојбата додека пазарат или додека извршуваат некоја друга обврска. Како и да е, тие никогаш не одат премногу далеку и колку-толку имаат контрола врз ситуацијата.
Меѓутоа, на многу од туристите им е чудно кога ќе видат бебе во количка пред продавница или кафуле. Па затоа, ако патот некогаш ве однесе во Копенхаген, не треба да ве изненади глетката на оставени колички со бебиња – тоа е сосема нормално во оваа скандинавска земја.