Силен земјотрес ја погоди Јапонија денеска, со интензитет од 7,0 степени, а потоа беше издадено предупредуање за можно цунами на североисточниот брег на државата.

Геолошкиот институт на САД (USGS) прво ја процени јачината на земјотресот на 7,2 степени, но подоцна ја ревидираше на 7,0 степени.

Засега нема извештаи за штети во земјотресот што се почувствува во главниот град Токио.

Земјотресот се случи нешто по 18.10 часот по локално време (10.10 часот по средноевропско време).

Епицентарот на земјотресот бил на 27 километри источно од Ишиномаки на длабочина од 60 километри. Тоа е крај брегот на префектурата Мијаги, на североисток, која беше сериозно оштетена во големиот земјотрес и цунамито од 2011 година.

Според јапонската Агенција за метеорологија, земјотресот предизвикал бранови високи околу еден метар.

Досега не е пријавена штета во префектурата Мијаги, а електричните компании ја проценуваат состојбата на нуклеарните централи во таа област, пренесуваат јапонските медиуми.

VIDEO: Street cameras capture magnitude 7.0 earthquake in #Japan
pic.twitter.com/Z0PEowg1XS

— Ethan Biando (@ethanb822) March 20, 2021