ВИДЕО: Заврши унгарската „бајка“, Италија ќе игра на Ф4 турнирот во Лигата на нации
![](https://www.slobodenpecat.mk/wp-content/uploads/2022/09/w_57953765.jpg)
Репрезентацијата на Унгарија до сега беше вистински хит во групата „3“ од А сегментот во Лигата на нации во конкуренција на Германија, Англија и Италија.
Вечерва во последното шесто коло на Унгарците им беше доволен и бод за пласман на Фајнал-фор турнирот, но Италија триумфираше со 0:2 на „Пушкаш“ арената во Будимпешта.
Италијанците ја остварија потребната победа за прво место во групата со головите на Распадори и Димарко. Избраниците на селекторот Роберто Манчини им се придружија на Хрватска и Холандија на Ф4 турнирот, а за последното место во завршницата од натпреварувањето се борат селекциите на Португалија и Шпанија.
Англија после ремито со Германија (3:3) на „Вембли“ стадионот во Лондон и официјално се пресели во понизок ранг, односно Лигата „Б“.
Водеа Германците со головите на Гундоган и Хаверц, следуваше пресврт на Англичаните, по еден погодок имаа Шо, Маунт и Кејн, овој последниот беше прецизен од белата точка, а конечниот епилог го постави Хаверц со својот втор гол на мечот во 87 минута.