Денеска се одиграа два натпревари од 29 коло во Премиер лигата, Вест Бромвич загуби дома од Евертон (0:1), а со истиот резултат Тотенхем славеше кај Фулам.

Евертон со погодокот на Ришарлисон во 65 минута дојде до 14 победа сезонава за клубот од „Гудисон парк“ во натпреварувањето.

Играчите на менаџерот Карло Анчелоти ја продолжуваат борбата за едно од местата кое води во групите на Лигата на шампионите, моментно се на четвртата позиција со освоено 46 бодови, зад водечкиот Манчестер сити (65), Манчестер јунајтед (51) и Лестер (50).

Тотенхем дојде до трите бода кај Фулам благодарение на автоголот на Адарабиојо во 19 минута.

Во второто полувреме, поточно во 63 минута фудбалерите на Жозе Мурињо имаа среќа, односно домаќинот успеа да израмни, но после интервенцијата од видео собата за проверка, беше поништен голот, бидејќи топката претходно во рака го удри Лемина.