Во пукање во две училишта во Бразил во напад на 16-годишен тинејџер, кој носел нацистички симболи, животот го загубија вкупно четири лица, три на местото на нападот, а една наставничката починала во болница, соопштија надлежните.

Властите во градот Аракруз, во државата Еспирито Санто, соопштија дека некои од 10-те ранети, меѓу кои тројца наставници и еден ученик, се во тешка состојба по нападот во петокот, кој ја шокираше земјата која бележи пораст на престрелките во училиштата во последните години.

„За жал, трагедијата во Аракруз сè уште не е завршена“, рече гувернерот Ренато Казагранде во саботата.

„Со длабоко жалење ја потврдуваме смртта на уште една жртва, професорката Флавија Амбос Меркон“, напиша на Твитер гувернерот, кој прогласи тридневна жалост во Еспирито Санто.

Напаѓачот е поранешен ученик на државно училиште кој прво го нападнал пукајќи во група наставници, при што убил две лица, а ранил уште други девет. Потоа отишол во блиското приватно училиште, каде убил еден и ранил уште неколку луѓе.

Тој е уапсен и ќе се соочи со обвиненија за убиство и тешко убиство во обид, соопшти полицијата на Еспирито Санта.

“Мојата ќерка секогаш беше полна со среќа и љубов. Ја изгубив ќерка ми поради омраза”, изјави за Глобоњуз, Таис Сагрило, мајка на убиеното 12-годишно девојче.

Според Истражувачкиот институт Соу да Паз, нападот е дванаесетто пукање во училиште во Бразил од 2002 година.