Вечерва се одиграа нови натпревари од европските квалификациите за пласман на следниот Мундијал, во еден од поинтересните дуели, Украина во Киев одигра нерешено со актуелниот светски шампион Франција (1:1).

Верувале или не, ова е веќе петто реми по ред од почетокот на кваликациите за Украинците кои први дојдоа во водство против „триколорите“ непосредно пред паузата со убавиот погодок на Шапаренко (44`).

„Триколорите“ не дозволија изненадување и на стартот од второто полувреме дојдоа до бодот кој го донесе Марсијал (50`).

Моментно во квалификациската група „Д“ води Франција со девет бодови од пет натпревари, следува Финска која има пет од три натпревари, третопласирана е Украина исто така со пет бодови од пет меча. Претпоследна е Босна и Херцеговина со два бода од три натпревари, а на дното е Казахстан со два бода од четири меча.

Данска продолжува победнички во квалификациите, го забележа и петтиот триумф по ред овојпат на гостувањето кај Фарските острови (0:1). Стрелец на единствениот погодок беше Винд во 85 минута после асистенцијата на Јенсен.

Во истата квалификациска група „Ф“ Израел беше убедлив дома над Австрија (5:2), а Шкотите со 1:0 славеа против Молдавија. Во генералниот пласман Данците имаат 15 максимални бодови, пред Израел (10), Шкотска (8), Австрија (7), Фарски острови (1) и Молдавија (1).

Во квалификациската група „Г“ Турција ја оправда фаворитската улога кај Гибралтар (0:3) со головите на Дервишоглу, Чалханоглу и Караман, додека Холанѓаните на домашен терен со 4:0 триумфираа против Црна Гора. За „лалињата“ двоен стрелец беше Депај, а по еден погодок имаа Вајналдум и Гакпо.

На табелата Турците имаат 11 бодови, пред Холандија и Норвешка по 10, Црна Гора има седум, Летонија четири, а Гибралтар ниту еден.

Хрватска во квалификациската група „Х“ го запиша третиот триумф (0:1) на гости со голот на Брозовиќ во самиот финиш од средбата во Братислава. На табелата водат Русите и Хрватите со по 10 бодови, седум има Словенија, шест Словачка, а по четири Малта и Кипар.

ВИДЕО: Митровиќ двоен стрелец, Србите го делат врвот со Португалија