Основниот граѓански суд Скопје ја одби тужбата за надомест на нематеријална штета за претрпен страв и душевна болка како и за спреченост на правото за информирање при известувањето од организираниот напад на Собранието на 27 април 2017, поднесена од тогашниот новинар на САКАМДАКАЖАМ.МК, Горан Трпеноски. Во образложението на одлуката на Судот, се наведува дека САКАМДАКАЖАМ.МК не е медиум, а Трпеноски не е новинар.

– Со оглед на тоа што тужителот согласно Законот за медиуми не можел да има својство на новинар, бидејќи здружението каде тој бил вработен не претставува издавач на медиум, ниту пак дигиталната редакција САКАМДАКАЖАМ.МК претставува медиум регулиран со Законот за медиуми, тужителот нема активна легитимација да бара од тужениот да му биде платена отштета за евентуално загрозување на слободата на изразување, се наведува во одлуката.

Судот констатира дека тужената странка Република Северна Македонија според законот, може да исплати нематеријална штета само во случај кога настанала смрт, телесна повреда или уништување на имотот на тужителот. Оттаму, се одбива и овој основ во тужбата на Трпеноски. Претрпените страв и душевна болка за кои тој приложил докази од вештачење, не се земени предвид, бидејќи според Судот, се непотребни во парницата.

– Тужителот во овој настан не бил повреден. Кај него било предизвикано чувство на страв, но Република Северна Македонија не е одговорна по тој основ за да му ја надоместува евентуалната штета на тужителот, напишала во образложението на пресудата судијката Јованка Спировска-Панева.

Таа наведува дека за организираниот напад на Собранието на 27 април 2017 година е водена кривична постапка, дека се најдени и осудени виновниците, па упатува тужителот евентуално од нив да бара надомест на штета.

Судијката се повикува на законската одредба според која „издавач на медиум е физичко или правно лица кое врши дејност на издавање на печатен медиум, или емитување на радио и телевизиски програми“, а дигиталните редакции не ги признава за медиуми.

-За мене дека не сум новинар, сметам дека е голема навреда од судот. Бев во дигиталната редакција на СДК, претходно скоро 19 години бев во дневниот весник Вест. Сега доаѓа време да да ти речат ти не си новинар, бидејќи си работел во портал кој што според законот не е медиум. СДК е регистриран како дигитален весник. Законот е тој. Јас не се откажувам, продолжуваме на Апелација, потоа одиме во Стразбур. Се чувствувам и навреден бидејќи на 27 април да не бевме ние новинарите, немаше да бидат сегашните функционери на власт, нема сега да зборуваме. Нашата храброст и обврска да ја информираме јавноста, успеа да спречиме да не дојде до најлошото – да нема мртви, изјави во Утрински брифинг, Горан Трпеноски.

-Јас сега би побарал од авторитетите и од Рускоска, ако не сум бил новинар, а во Собрание сум присуствувал како не новинар, тогаш што сум барал во Собрание. Сум залутал? Сум бил во организираната група, сум влегол илегално, праша Трпеноски.

Сега е време да седнат сите новинарски здруженија, власта, опозицијата, да седнат и да направат измена. Оваа пресуда може да значи еден исчекор напред за решавање на проблем. Имаме конкретна ситуација и една небулоза. Што е можно побрзо ова прашање мора да се стави на хартија и да се реши, смета Трпеноски.

Целиот разговор погледнете го во видеото: