Американскиот претседател Доналд Трамп влезе во „тесла“ за да ја покаже својата поддршка за компанијата за електрични возила на Илон Маск, кој е омразена фигура поради неговата позиција да ја унапреди политичката агенда на претседателот и да ги намали трошоците на федералната влада. Всушност, американскиот претседател најави дека ќе ги третира нападите врз автомобилските дилери на нивниот сојузник како терористички акти.

На прашањето на новинар надвор од Белата куќа дали нападите врз дилерите на „тесла“ ќе бидат класифицирани како терористички напади, американскиот претседател одговори:

„Ќе го сторам тоа, ќе ги спречам затоа што ѝ нанесуваат штета на големата американска компанија“.

Според АП, американскиот претседател при влегувањето во црвениот автомобил 2Tesla Model S“ со 1020 коњски сили, извикал „леле“ и коментирал „прекрасно е“.

Маск влезе на совозачката страна.

„Ова ќе ѝ предизвика срцев удар на Тајната служба“, рече Трамп додека разговараше за тоа како да го стартува возилото што може да достигне 60 милји на час за неколку секунди.

Трамп им рече на новинарите дека ќе напише чек за автомобилот, кој се продава за околу 80.000 долари, и ќе го остави во Белата куќа за да може неговиот персонал да го вози.

Претседателот, исто така, рече дека се надева дека неговото купување ќе го зголеми богатството на „Тесла“, која бележи пад на нејзината продажба. „Тоа е одличен производ“, рече тој.

Акциите на „Тесла“ пораснаа во вторникот, по изјавите на Доналд Трамп за автомобилската индустрија. Според Си-ен-ен, акциите на „Тесла“ се затворија за 3,8 отсто во вторникот, враќајќи малку позиции од загубите во понеделникот.