ВИДЕО | Тодорче Тасевски: Многу поети најавија дека ќе дојдат на Струшките вечери на поезијата

Јубилејното 60-то издание на поетскиот фестивал Струшки вечери на поезијата, годинава ќе се одржи од 26 до 30 август.

„И ова јубилејно издание на Струшките вечери на поезијата го одбележуваме во услови на пандемија а кое што го засега фестивалот на повеќе нивоа. Меѓу другото и на ниво на буџетот кој оваа година е скратен поради пандемијата. Сепак ние со рационално користење на средствата ќе се прилагодиме и со тие средства ќе организираме едно пристојно фестивалско издание, кое што сигурни сме дека ќе биде подобро од изданието од минатата година. Во екот на пандемијата тоа беше хибридно, со домашни поети кои настапуваа во живо и странски поети кои беа претставени преку видео читања.

Оваа година веќе имаме најавено физичко присуство на дваесетина поети од странство и се надеваме дека ова издание ќе биде во секој случај подобро од претходното, меѓутоа сепак нема да може да го следи оној формат на редовните фестивалски изданија. Програмата ќе ја задржи својата структура, со тоа што во рамки на националната програма за одбележување на 100 години од раѓањето на нашиот великан Блаже Конески, Струшките вечери се вклучени преку специјално издание од изборот на поезијата и прозата од Конески, приредувач е професор Атанас Вангелов, книгата е веќе готовоа и нејзината промоција ќе се одржи за време на фестивалот. Предвидено е и едно музичко чествување на Конески, се работи за млади бендови кои ќе направат аранжмани на поезијата на Конески и на тој начин ќе се обидеме да се доближиме до помладата публика“, вели за Утрински брифинг, Тодорче Тасевски, директор на Струшките вечери на поезијата.

Тој рече дека годинешната добитничка на Затниот венец, Керол Ен Дафи нема да дојде во Струга заради рестрикциите што Велика Британија на своите гражани по враќањето од странство. Публиката ќе има можност да види нејзино видео читање. Додека пак минатогодишниот добитник, Амир Ор, го најавил своето присуство на фестивалот.

Тасевски кажа дека од денеска на веб страницата на Струшките вечери на поезијата е поставена песната Т’га за југ во дигиталното издание на „Полиглота“ од 1994 година, во кое се поместени 74 препеви и адаптации на 43 јазици.

„Поестителите на сајтот ќе можат да ја прелистаат таа книга, а ќе може и да го прочитаат и толкувањето на Т’га за југ од Блаже Конески. И ова е почеток на еден поголем проект со кој целокупната издавачка дејност на Струшките вечери ќе се дигитализира и ќе биде достапна за пошироката публика“, додаде Тасевски.

Видео на денот