ВИДЕО: Тито во Лондон, зборува англиски пред Черчил на првото патување по конфликтот со Сталин
Познатата британска компанија за вести и филмски журнали, актуелна во 20-от век, „British Pathѐ“ со години објавува снимки од својата богата архива, а меѓу нив е и интересно видео за посетата на поранешниот југословенски претседател Јосип Броз Тито на Велика Британија во 1953 година.
На снимките, кои ги придружуваат информации за посетата, се гледа како Тито пристигнува во Британија со бродот „Галеб“, а го пречекуваат премиерот Винстон Черчил, министерот за надворешни работи Ентони Идн, како и сопругот на британската кралица Елизабета Втора, принцот Филип.
Тито на домаќините им се обратил на англиски јазик, а на снимката може да се види дел од неговиот говор, што е ретка можност да се чуе маршалот како зборува англиски.
Нараторот во видеото кажува дека ова е првото излегување на Тито од Југославија по историското разидување со советскиот лидер Јосиф Сталин во 1948 година, како и дека во Лондон имало демонстрации на противници на посетата на Тито. Британските тајни служби биле ставени во висока готовност поради најавите за можен обид за атентат врз Тито во Лондон.