Владата на државата Викторија потврди дека сите тенисери кои ќе играат на „Австралија опен“ ќе бидат 14 дена во карантин во Мелбурн, пред почетокот на првиот грен слем во новата сезона. Владата соопшти дека здравствените власти ги одобриле плановите за карантин.

Турнирот „Австралија опен“ ќе се одржи од 8 до 21 февруари, а за првпат во повеќе од 100 години историја, ќе се игра во вториот месец од годината.

Титулата ја брани најдобриот светски тенисер, Србинот Новак Ѓоковиќ, рекордер со осум трофеи, а на социјалните мрежи на „АО“ се објавени неговите пет најдобри потези во Мелбурн.

Won eight #AusOpen titles with shots like these ? ?

Not too bad at all, @DjokerNole ? pic.twitter.com/psHsYCiIx5

— #AusOpen (@AustralianOpen) December 18, 2020

Учесниците се очекува да пристигнат во Мелбурн кон средината на јануари, каде потоа ќе поминат две недели во задолжителен карантин поради коронавирусот. Тие ќе можат да тренираат максимум пет часа дневно во „Мелбурн“ паркот.

Исто така, се наведува дека играчите и нивните тимови ќе бидат тестирани пред да заминат за Австралија, а потоа најмалку петпати за време на карантинот. Во случај некој да биде позитивен, ќе се преземаат стандардни процедури за карантин додека не добие одобрение од здравствените власти.

Државата Викторија помина низ сериозен втор бран на коронавирус во последната половина на оваа година, што резултираше со над 800 смртни случаи. Викторија не пријавила нови случаи на коронавирус во последните шест недели.