Спомен куќата „Музеј на Лазар Личеноски“ е еден од најважните проекти на Националната галерија на Република Северна Македонија и годинава таа ќе почне да се реновира, вели директорката Дита Старова Ќерими.

„Ова е приоритет како за Националната галерија , така и за целокупната културна јавност во земјава заради што постојано поттикнува голем интерес. Но воедно е и проект во кој се соочуваме со многу предизвици при неговото реализирање бидејќи Националната галерија во свое владение има и други објекти кои се културно наследство и за кои е потребна постојана грижа. Со куќата на Личеноски имаме потешкотии бидејќи се работи за долг процес што опфаќа повеќе фази и ангажман од повеќе тимови и стручни лица и институции кои заради човечкиот фактор го забрзуваат или успоруваат самиот процес. Проектот опфаќа фази на конзервација, адаптација и ревитализација на куќата. Процесот на прогласување на куќата за културно наследство започнал уште во 2008 година, но дури во 2010 година прв пат тимови од Националната галерија и други надлежни институции беа вклучени во евидентирањето на куќата како културно добро, бидејќи таму има слики, мозаици, етнолошки материјал, документи и сл.

За да се избегне опасноста од кражба или уништување, Галеријата во своите депоа ги згрижи сликите и движните мозаици од колекцијата на Личеноски, како и неговите лични цртежи, слики, скулптури. Од 2015 година, Националната галерија и официјално е задолжена од владата да управува со куќата со обврска да изврши евиденција на целокупниот имот и да го згрижи движното и недвижното културно наследство. Во 2020 година беше изработен основниот проект за конзервација и реставрација на куќата на Личеноски. Можам да кажам дека куќата е во релативно добра состојба, но неминовно е да се отпочне со реновирање за да конечно таа ја оствари својата вистинска намена Спомен-куќа ‘Музеј на Лазар Личеноски’.

Кога велиме во добра состојба тоа значи дека ние, од наша страна како институција која ја поседува во владение, се грижиме сè што во даден момент ќе се покаже како потреба да го санираме до отпочнување на активностите за нејзина ревитализација“, вели за Утрински брифинг Дита Старова Ќерими, директорка на Националната галерија. Таа соопшти дека ќе се отпочне и со реновирање на објектот на Мала станица.