ВИДЕО | Спасовски: Ќе правиме увид ако имаме сознанија, кривично дело е издавање викенд куќи на групи на луѓе
Министерот за внатрешни работи, Оливер Спасовски на денешната прес-конференција упати порака до издавачите на викенд куќи – да не ги издаваат своите објекти за новогодишната ноќ, затоа што ќе следат санкции.
-Овие мерки никој не ги посакува, но се неизбежни во овој период. Треба самите да си помогнеме. Нема забрана за издавање на викенд куќи за семејства. Но кривично дело е издавање викендици на групи на луѓе. Превентивно реагираме на издавачите на викенд куќите- рече Спасовски.
Ќе има засилени контроли, потенцираше тој.
-За полицијата ќе има многу работа, но здравјето на граѓаните е врвен приоритет и ќе се прави увид и во викендиците и ќе следуваат казни. Сериозна одговорност е издавањето на вилите- истакна Спасовски.
Таму каде што ќе имаме сознанија дека има групирање на лица во издадени викенд куќи, ќе се направи увид и ќе се поднесат соодветни пријави, ова е кривично дело, потенцираше Спасовски.
Од утре, 18 декември, до 20 јануари, сите угостителски објекти наместо до 21 часот ќе работат до 18 часот. Се забранува организирање на предновогодишни и новогодишни прослави на отворен и затворен простор, од страна на општините, работните организации.