ВИДЕО: Слушнете ја официјалната химна на Европското првенство
Сите со нетрпение го очекуваме почетокот на новото Европско првенство, а секако особено дебитантскиот настап на најдобрата македонска репрезентација.
Како што е познато ЕП ќе се одржи од 11 јуни до 11 јули 2021 година, а ќе се игра во 11 градови: Амстердам, Баку, Букурешт, Будимпешта, Копенхаген, Глазгов, Лондон, Минхен, Рим, Санкт Петербург и Севиља.
Првиот меч на континенталниот собир е на 11 јуни на стадионот „Олимпико“ во Рим помеѓу Италија и Турција. Финалето е на 11 јули на стадионот „Вембли“ во Лондон.
УЕФА денеска ја објави официјалната химна на Европското првенство „We Are The People“ или преведено „Ние сме луѓето“.
Во изведба на Боно, The Edge и познатиот холандски диџеј и продуцент Мартин Гарикс, оваа песна претставува заедништво, особено во светло на сите предизвици со кои се соочи светот во последната една и пол година, а со акцент на посебноста на овој турнир, кој се игра за првпат низ цела Европа.
Презентацијата на песната беше организирана во Лондон, на големите екрани на култниот стадион „Вембли“.
– Фудбалот и музиката имаат моќ да ги зближат луѓето. Тие претставуваат страст и чувство, и нивното комбинирање ќе го продлабочи понатамошното прославување на навивачите на турнирот, како и достигнување до нова публика. Со ѕвездената постава што ја составивме за да ја создадеме официјалната музика на турнирот, сигурно ќе го направиме токму тоа – рече директорот за маркетинг на УЕФА, Гај-Лорен Епстајн.