Велика Британија е првата западна земја што одобри вакцина против коронавирус од производителот „Фајзер“. Британскиот регулатор, МХРА, вели дека вакцината, за која се проценува дека е ефикасна до 95 проценти, е безбедна за употреба.

Властите најавија дека вакцината ќе може да се користи од најранливите категории на граѓани почетокот на наредната недела.

Британскиот здравствен комитет ќе одлучи која ќе биде приоритетната група на граѓани кои ќе ја добијат првата вакцина, а тука спаѓаат старите и немоќни лица во старските домови, здравствените работници и повозрасните Британци кои патат од хронични болести.

Првите 800.000 дози ќе бидат достапни во Велика Британија уште од наредната недела, а веќе нарачаните 40 милиони дози ќе бидат доволни за вакцинирање на 20 милиони луѓе.

Гостин во Утрински брифинг беше новинарката Жанета Скерлев која во Утрински брифинг ги пренесе реакциите од Британија.

-Реакциите беа триумфалистички. Пред прес-конференцијата на премиерот министерот за здравство изјави дека „Денот е за помнење, а годината е за заборавање“.

-Велика Британија купи доволно дози од три произведувачи на Вакцина. Малку е поматено расположението бидејќи не беше меѓу првите вакцини, домашната Оксдфордска. Вакцинирањето ќе почне на луѓето над 80 години, здравствениот персонал и сите оние кои се грижат за старите и изнемоштени лица, вели Скерлев.

-Амбициите се огромни. ЕУ ќе ја одобри вакцината на 29 декември. Политичарите тука сакаат да кажат дека благодарение на Брегзитот Велика Британија се ослободила од стегите на ЕУ и први ја овозможиле вакцинацијата, вели Скерлев и додава дека е потребна неверојатна логистика вакцината да се пренеси поради специфичните услови на чување на вакцината на Фајзер.

-Моралот на луѓето е подигнат. Премиерот Џонсон изјави дека научниците го искористиле вирусот да изведат со него „биолошки џиуџицу и од него да направат смртоносно оружје“, изјави Скерлев.