Изборниот штаб на Демократската унија за интеграција во Чаир вчеравечер беше отворен со овации и аплаузи, но и со пукање од пиштол, кога пред присутните се појави потпретседателот на партијата и поранешен градоначалник на скопската општина, актуелниот пратеник Изет Меџити.

На снимката, која ја објави Плусинфо, се гледа како Меџити го започнува својот говор, поздравен од партиските членови, а тој веднаш е прекинат од десетина последователни истрели од пиштол. Во позадина се гледа и човекот кој пука во воздух, додека Меџити му сигнализира да запре со стрелбата.

На отворањето на штабот во Чаир се обратија и првиот вицепремиер Артан Груби и актуелниот градоначалник и кандидат за втор мандат во Чаир, Висар Ганиу. Членовите и симпатизерите на ДУИ досега повеќепати ги славеа изборните резултати со истрели од огнено оружје, а последен таков случај за кој дозна јавноста беше минатата година.