ВИДЕО: Шампионот Милвоки демолиран во Мајами, „воините“ ги средија и Клиперси

Мајами го растури актуелниот шампион победувајќи го со 42 поени разлика/фото: EPA-EFE/TANNEN MAURY

Актуелниот шампион Милвоки бакс доживеа убедлив пораз на гостувањето кај Мајами со дури 42 поени разлика, 137:95. Кошаркарите на Мајами дилемите околу победникот ги решија во првата четвртина која ја добија со 40:17, а во еден момент на семафорот стоеше 29:5.

Тајлер Хироу со 27 поени беше најдобар кај „жешките“, Џими Батлер постигна 21, додека Бем Адебајо имаше дабл-дабл од 20 поени и 13 скокови. Кај Милвоки, Јанис Адетокумпо беше прво име со 15 поени и 10 скокови.

Кошаркарите на Голден Стејт вориорс по триумфот на стартот од сезоната над ЛА Лејкерс, сега го совладаа и вториот тим од Лос Анџелес, Клиперси и тоа со 115:113.

Овој пат „воините“ славеа на домашен терен, а иако во одреден момент имаа и 19 поени преднос, победата ја обезбедија во последната минута. Стеф Кари погоди две тројки по ред за водство на Голден Стејт од 111:109, а потоа Дрејмонд Грин и токму Кари од линијата за слободни фрлања ја обезбедија победата.
Стеф Кари беше неверојатен со 45 поени и 10 скокови, Ендрју Вигинс даде 17 поени за Голден Стејт, додека кај ЛА Клиперс Пол Џорџ имаше учинок од 29 поени и 11 асистенции.

Атланта хоукс со убедливи 113:87 го победи Далас маверикс во својот прв натпревар на домашен терен во новата сезона. „Јастребите“ од стартот на втората четвртина го презедоа водството, а одлучувачката предност ја направија во третата четвртина кога со серијата од 15:0 дојдоа до недостижни 70:49.
Кем Редиш со 20 поени беше најпрецизен кај Атланта каде се истакна и Тре Јанг со 19 поени и 14 асистенции, додека кај Далас Лука Дончиќ имаше 18 поени и 11 скокови.

 

Видео на денот