Собранието на Република Северна Македонија со 70 гласа „за” го донесе Законот за спречување и заштита од дискриминација. Усвојувањето на овој закон е од исклучително значење пред се за граѓаните, напиша денеска министерката за труд и социјална политика Јагода Шахпаска на својот фејсбук-профил по донесувањето на Законот.

Тој, како што вели Шахпаска, јасно ги дефинира основите на дискриминација, вклучително и сексуалната ориентација и родовиот идентитет, во согласност со меѓународните стандарди и европската регулатива.

Воедно, пишува министерката, тој ја регулира и работата на Комисијата за спречување и заштита од дискриминација, како независно тело составено од професионалци од областа на човековите права, еднаквоста и недискриминацијата.

Собранието вчера во рамки на 19. седница со 70 гласа „за” го донесе Законот за спречување и заштита од дискриминација.

Законот обезбедува принцип на еднаквост во заштитата од дискриминација и во остварување на човековите права и слободи.

Собранието го донесе Законот за спречување и заштита од дискриминација