Во петтиот натпревар од Ц сегментот во Лигата на нации, македонската фудбалска А-репрезентација на Националната арена „Тодор Проески“ во Скопје славеше со 1:0 против Летонија.

Единствениот погодок за нашата репрезентација го реализираше Никола Серафимов во 57 минута од средбата. Тоа е прв гол за Серафимов во сениорскиот национален дрес.

Стартниот состав на Македонија: Димитриевски, Алиоски, Зајков, Серафимов, Димоски, Барди, Алими, Елмас, Трајковски, Миовски, Чурлинов. Настапија и Ќамили, Ристовски, Митровски, Велковски и Ашковски.

На тој начин нашите најдобри фудбалери го потврдија пласманот во повисокиот ранг Б од натпреварувањето.

Во истата група претходно селекцијата на Фарски Острови направи изненадување славејќи против Ерменија со 1:0.

По пет кола, Македонија е на првото место во групата 4 со 13 бодови, пред Фарски Острови со шест, а по четири имаат Ерменија и Летонија.

Во последниот, шести дуел, кој исто така ќе се игра во Скопје, Македонија ќе ја пречека репрезентацијата на Фарски Острови.