Годината 2021 на актерката Сара Климоска ѝ почна со наградата „Shooting Stars“ играше во неколку значајни театарски проекти и три играни филмови и со тоа се вброи во редот на уметниците кои ја одбележаа годината.

„Иако пандемијата ја забави работата во театарот и филмот, сепак работите тргнаа на добро. Инаку јас не сум првата што ја добив наградата „Ѕвезда во подем“ што ја доделува Берлиналето, пред мене ја имаат освоено и Благој Веселинов, Наташа Петровиќ, Лабина Митевска и тоа е важно и за македонската кинематографија, а за мене има огромно значење“, вели за Утрински брифинг, актерката Сара Климоска.

Оваа година, во театарот Климоска ќе ја паметиме по улогите во два значајни проекти на режисерката Нела Витошевиќ: „Мојот маж“ според расказите на Румена Бужаровска во Драмски театар и претставата „Работи за кои не зборуваме“ во МНТ.

„Нела во последните неколку години развива еден многу интересен документарен пристап во театарот, кој што мислам дека е многу присутен на европско и на светско ниво, меѓутоа кај нас се’ уште не дошол, па таа го развива и тоа. Вечерва ја завршуваме сезоната во Драмски театар со изведба на „Мојот маж“. А во последната претстава на Нела Витошевиќ пристапот целосно е документарен, врза база на наши лични монолози, извадоци од весници и анонимни приказни кои што ни бе испратени лично нам и кога ги добивме увидовме што е тоа труло во нашето општество и за што треба да зборуваме во претставата. Меѓу другото ги раскажавме и приказните на Марија Радуловиќ, актерката што ја разоткри аферата во Србија со професорот по глума која ја злоставувал, и на Данијела Штајнфел, случај кој можеби не доби соодветна судска завршница, меѓу другото и заради тоа што кај нас немаше луѓе што јавно излегоа дека доживеале такви ситуации кај нас, за жал верувам дека тоа се случило и овде но се’ уште не сме се охрабриле да го кажеме тоа, и тоа веројатно го отсликува нашиот страв и нашата конзервативност во ова општество“, вели Климоска.

Изминатата година Сара Климоска има свои улоги во дури три филмови: првиот долгоетражен филм на режисерот Горан Столески „You won’t be alone“ и кој што влезе во официјалната селекција на престижниот Санденс фестивал во САД. Потоа во новиот филм на Милчо Манчевски „Кајмак“ и во доглометражниот првенец на Елеонора Венинова, насловен „Преекспонирано“.

Проследете го целиот разговор во видеото