ВИДЕО: Расте бројот на странски туристи, најмногу од Турција, Србија и Полска
Природните убавини и културни знаменитости на Македонија само во јули годинава ги посетиле 169.449 туристи. Од нив 54 проценти се домашни, а 46 проценти се странски туристи, според Државниот завод за статистика.
Најмногу туристи во земјава во јули пристигнале од Турција – 12.841, па Србија – 9.393, од Полска 5.412, од Германија, 3.698, потоа од САД 2.721, Бугарија – 2.286, Словенија – 2.099, како и 1.828 од соседна Грција.
Најголем дел од туристите во јули летувале во езерските места – над 105 илјади, додека Скопје го посетиле над 36 000 туристи, покажува статистиката.
Вкупно во јули се реализирани 700.629 ноќевања, од кои 74,3 проценти се од домашните туристи, а 25,7 проценти од странските.
Хотелско сместување користеле 99.000, а над 56.000 се сместиле во куќи, станови за одмор и соби за издавање.
Колку за споредба, во првите седум месеци од минатата година вкупно се регистрирани 317.713 туристи кои оствариле 1.034.645 ноќевања.
Статистиката покажува дека во периодот јануари – јули годинава во однос на истиот период од претходната година, бројот на туристите е зголемен за 53,3 проценти, при што кај домашните туристи има зголемување за 13,7 проценти, а кај странските зголемувањето е за 109,9 проценти.
Кај ноќевањата во периодот јануари – јули годинава во однос на истиот период од претходната година, има зголемување за 34,6 проценти, кај домашните за 9,8 проценти, а кај странските зголемувањето е за 95,9 проценти.