По двегодишна пауза поради пандемијата, Матурската парада денеска повторно ќе се одржи. Почетокот е закажан за во 12 часот, а покрај традиционалниот матурски „Квадрил“ ќе се игра и Салса. Присутните матуранти ќе ги поздрави градоначалничката на Град Скопје Данела Арсовска, заменик амбасадорот на ЕУ Џулијан Васало и Деканот на универзитетот за туризам и менаџмент Сашко Драматниковски .

Директорот на дирекцијата за култура на Град Скопје, Никола Глигоров во Утрински брифинг рече дека оваа година на парадата ќе учествуваат околу 400 матуранти.

– Матурската парада е дел од еден поголем проект кој го нарековме „Мај – месец на матурантите“. Покрај матурската парада, ќе се случи и средба на градоначалничката Данела Арсовска со најдобрите матуранти. Официјалниот дел од програмата ќе започне во 11.45 минути. Точно во 12 часот ќе го преземеме сигналот од Радио Словенија, кој годинава се пренесува во шест држави, Словачка, Унгарија, Словенија, Србија, Црна Гора и Македонија, односно само во Скопје. Минатите години имавме учесници од цела држава и се надевам дека така ќе биде и во иднина, кога седум пати поставувавме Гинисов рекорд во истовремено синхронизирано танцување на еден ист танц, рече Глигоров.

На парадата за првпат ќе се сретнат матуранти од различни училишта, а за да бидат синхронизирани во танцот, тие ги вежбаа танците речиси два месеца во сите училишта одделно. Оваа година на матурската парада ќе учествуваат околу 400 матуранти.