ВИДЕО: Партизан израмни против Црвена звезда, „мајсторка“ решава за АБА титулата
Кошаркарите на Партизан вечерва ја совладаа Црвена звезда со убедлив резултат 112:84 и израмнија на 2:2 во финалната серија од АБА лигата.
Освен во воведните минути од натпреварот, каде Звезда беше нешто подобар ривал и кога имаше осум поени предност (22:14), остатокот од мечот целосно му припадна на Партизан.
Екипата на Жељко Обрадовиќ поведе на крајот од првиот дел, по што имаше осум разлика (35:27), а и во вториот дел беа расположени домаќините.
Партизан погодуваше скоро од сите позиции, а по 20 минути игра беа неверојатни 68:43 во корист на „црно-белите“.
Партизан во продолжението од натпреварот ја одржуваше стекнатата предност. По три четвртини, на семафорот беше „плус 25“, 88:63, а нешто подоцна разликата надмина и над 30 коша.
Алекса Аврамовиќ го предводеше Партизан со 24 поени, а Матијас Лесорт додаде 19. Кај Звезда најефикасен беше Остин Холинс со 19 поени.
Одлуката за шампионот во АБА лигата ќе го дознаеме в понеделник (20.00 часот) во петтиот решавачки меч пред навивачите на Црвена звезда.