ВИДЕО: Пандев со асистенција во поразот на Џенова!
Денеска на стадионот „Луиџи Ферарис“ се одигра заостанатиот натпревар од третото коло во најсилното италијанско првенство во кој Џенова загуби од Торино со резултат 1:2.
Во првото полувреме гостите поведоа со погодокот на Лукиќ во 10 минута, а предноста беше зголемена после автоголот на Пелегрини.
Горан Пандев за домаќините го одигра целото второ полувреме, го замени Голданига и до крајот на средбата неговиот клуб само успеа да го ублажи поразот.
Македонскиот репрезентативец во судиското надополнување (90+4`) убаво го пронајде Скамака за поставување на конечниот епилог.
Загрижувачки е тоа што Џенова веќе петти меч во низа во Серија А е без триумф, моментно е на 16 позиција со пет бода. Во наредното коло на домашен терен на 8 ноември ќе ја пречека екипата на Рома која пак пет меча по ред не знае за пораз, а досега единствениот беше службен (3:0) на 19 септември против Верона.