ВИДЕО | „Ова сум вистинската јас“: Сиа откри дека е во аутистичниот спектар
Две години откако се извини за начинот на кој беше прикажан аутизмот во нејзиниот филм „Music“, австралиската пејачка Сиа Фурлер откри дека и самата е во аутистичниот спектар, пренесе „Би-би-си“.
За време на гостувањето во „Rob Has a Podcast”, поткаст посветен на американското реално шоу „Survivor“, ѕвездата рече дека нејзината дијагноза ѝ донела чувство на олеснување.
„Цели 45 години си велев: ‘Мора да го ставам мојот човечки костум’, но во изминатите две години јас станав вистинската јас“, откри Сиа.
Покрај пеењето, Сиа е истакнат текстописец, а нејзините песни „Chandelier“, „Titanium“ и „Cheap Thrills“ веќе важат за музички евергрини.
Но, во 2021 година се испроба и како режисерка на филмот „Music“, мјузикл за жена која станува единствена негувателка на нејзината полусестра, тинејџерка со невербален аутизам.
Тогаш јавноста ја искритикува Сиа поради тоа што ѝ ја даде главната улога на Меди Зиглер, девојката која се прослави со танцувањето во нејзините спотови и не се наоѓа во аутистичниот спектар.
Сиа, која во минатото имаше проблем со алкохолизмот, проговори и за борбата со зависноста.
„Никој не може да те знае и да те сака кога си полн со тајни и живееш со срам. Дури кога ќе седнеме во соба полна со непознати лица и ќе им ги кажеме нашите најдлабоки, најтемни, најсрамни тајни и сите ќе се насмеат со нас, а ние за првпат во животот нема да се чувствуваме како ѓубре, туку ќе бидеме вистински видени, тогаш можеме да зачекориме во светот и да започнеме да функционираме како луѓе со срца без да се преправаме дека сме нешто друго“, изјави таа во поткастот.