Стотици граѓани вчеравечер се забавуваа и уживаа во предновогодишната атмосфера на отворањето на „Зимзоленд“ што се одржува на паркингот пред Спортскиот центар „Јане Сандански“ во Аеродром.

„Зимзоленд“ ќе трае до 19 јануари, а организаторите најавуваат повеќе музички настани за сите возрасти, „свирки“ во живо, настапи на диџеи и тематски вечери како што се латино хип-хоп вечери за љубителите на динамични ритми и македонски народни вечери. Ќе има и караоке шоу.

Но, она што е најпривлечно за скопјани во овој период секако е лизгалиштето, но и забавниот парк со неколку адреналински реквизити, а поставени се и новогодишни куќарки каде што можат да се купат различни производи и традиционалните јадења, од слатки и колачиња, до рачни изработки и уникатни новогодишни украси, но и греано вино и ракија.

Нашата цел е да создадеме празнична атмосфера што ќе ги обедини сите генерации, преку импресивни декорации, светлосни шоу програми и разнобојни активности, богата музичка програма, забавен луна-парк, артисти и аниматори и театарски престави кои ќе создадат мини населба претворена во вистинска зимска бајка. „Зимзоленд“ е настан каде ќе се сретнат традицијата и современите трендови за да се создаде уникатна новогодишна атмосфера која ќе ги освежи срцата на сите посетители и ќе ги потсети на убавината на празничниот дух – најавија организаторите, Здружение за организирање на настани „Зимзоленд“ од Скопје, пред отворањето.

Колку им недостасуваат на граѓаните вакви убави празнични моменти и новогодишна атмосфера, особено што Град Скопје засега не им нуди ништо, говорат фотографииите и видеото кои ги направи нашиот фоторепортер Методи Здравев.