ВИДЕО | Од Канада дојдоа во родниот крај да снимат две македонски песни: Слушнете ги „Боже правда нема“ и „Мојот живот“
Брачниот пар Соња Лозановска и Оливер Петковски од Торонто кои се по потекло од Битола иако се далеку од родната грутка преку музиката ги негуваат своите корени. Убавините на Македонија и богата историја се нивната најголема инспирација
Поводот за нивниот престој во татковината е работата на две нови македонски новосоздадени песни кои се креација на врвни македонски уметници.
„Боже правда нема“ и „Мојот живот“ се наслови на песните за кои текстот го напиша Борче Нечовски, а музиката и аранжманот се на Дејан Момироски.
Песната „Боже правда нема“ доловува автентичен мелос од егејскиот дел на Македонија, а според зборовите на Соња Лозановска содржината и актуелноста на текстот ќе допрат до сечие срце.
Втората нова песна „Мојот живот“ е со родољубива, печалбарска тематика на која работеше истиот авторски тандем, Нечовски и Момироски.
И двете нови песни имаат видео записи реализирани на повеќе локации во Битола, Пелагониското Поле и во Манастирот Св. Петка во битолското село Цапари.
Во песната „Боже правда нема“ со оригинална кореографија учествува фолклорниот ансамбл „Гоце Делчев“ од Битола во кореографија на Бранко Жежовски.
Во песната гостуваат: Благојче Трајковски на кларинет и Филип Нуневски на труба.