Македонскиот репрезентативец вчера беше еден од стрелците во победата на Лидс на домашен терен против Њукасл (5:2).

Езгјан Алиоски го постигна првиот гол во Премиер лигата, а клубот од „Иланд роуд“ после петтата победа сезонава е на 13 место со 17 бодови.

Во наредното коло играчите на менаџерот Марсело Биелса ги очекува нов голем предизвик, односно в недела, 20 декември, на „Олд Трафорд“ против Манчестер јунајтед од 17.30 часот.

„Црвените ѓаволи“ и оваа сезона немаат најдобри резултати, но во пресрет на претстојниот премиерлигашки меч во последните пет натпревари имаат четири победи и едно реми за моментно деветто место со 20 бодови.

– Прекрасно беше да се гледа како пет различни играчи постигнуваат голови (против Њукасл), како и самата транзиција од одбрана во напад. Секогаш е добро по победа, тоа беше важно за нас за моралот и мотивацијата и тимскиот дух на екипата. Никогаш не се предаваме, секогаш веруваме и знаеме со начинот како играме. Успехот ќе дојде, само треба да продолжиме да работиме напорно и тогаш можеме да бидеме среќни. Нема време за одмор, мора брзо да се опоравиме, што е важно. Ќе го анализираме мечот со Њукасл и играта која ќе ја покажеме. Треба да работиме напорно за да дојдеме до нова победа – рече Алиоски по натпреварот со Њукасл.