Стеф Кари постигна рекордни во кариерата 62 поени, погоди 18 од вкупно 31 шут, додека од линијата за слободни фрлања погоди 18 пати од 19 обиди, а со промашеното слободно фрлање ја прекина низата од 80 погодени шута по ред.

Интересно е што постигна по 30 или повеќе поени во двете полувремиња, постигнување кое последен пат го направи легендарниот Пистол Пит Маравич во 1977 година.

– Сакам се што овој натпревар имаше да понуди, натпреварувачки дух и рафална стрелба. Никогаш не бегам од тоа и возбуден сум што тоа е атмосфера во која можам да играм на највисоко ниво – изјави Кари.

Центарот на Денвер нагетс, Никола Јокиќ оваа сезона е вистинска трипл-дабл машина. Во победата на неговиот тим од 124:109 над Минесота, Јокиќ имаше учинок од 19 поени, 12 скокови и 12 асистенции, со што дојде до четвртиот трипл-дабл сезонава, а Денвер ја прекина серијата од два порази по ред.

ЛА Клиперс со победата од 112:107 ги спушти на земја Феникс санс кои се на делба на првото место во Западната конференција. Пол Џорџ постигна седум тројки и натпреварот го заврши со 39 поени со што е најзаслужен за победата на клиперси кои заедно со ЛА Лејкерс и токму Феникс се на делба на првото место во Западот со скор 5:2.

Вашингтон визардс по катастрофалниот почеток на сезоната почна да победува и во вториот триумф по ред совладан е Бруклин нетс со 123:122. Кевин Дурент го имаше шутот за победа за Бруклин во последните моменти од натпреварот, но не беше прецизен.

Резултати:
Бруклин – Вашингтон 122:123
Мемфис – ЛА Лејкерс 94:108
Минесота – Денвер 109:124
Сан Антонио – Јута 109:130
Чикаго – Далас 118:110
Феникс – ЛА Клиперс 107:112
Голден Стејт – Портланд 137:122