Нови младински протести се случија вчера попладнето низ Брисел, кои повторно прераснаа во судири со полицијата, јави агенцијата Анадолу.

Полицијата интервенирала откако дел од демонстрантите почнале да оштетуваат корпи за отпадоци и електрични тротинети, како и да фрлаат камења и пиротехнички средства.

Протестот е организиран како реакција на полициското насилство за време на демонстрациите минатата недела против најавените кратења во образовниот сектор.

ВИДЕО | Судири меѓу демонстранти и полиција на протест во Брисел, службите фрлаа и солзавец

Во текот на протестите, кои траат веќе втора недела по ред, полицијата повторно употреби солзавец и водени топови, а според извештаите на терен биле забележани и полицајци кои користеле палки против демонстрантите. Властите најавија истрага за инцидентите.

Незадоволството е предизвикано од обемниот пакет мерки за штедење што го подготвува владата на француската заедница во Белгија. Меѓу мерките се зголемување на наставниот фонд за професорите во повисоките одделенија на средните училишта и можност за воведување повисоки школарини.

Владата планира да ги зголеми годишните школарини за високо образование од 835 на 1.194 евра за поголемиот дел од студентите, што претставува зголемување од 35 отсто. Властите ова го оправдуваат како дел од мерките за намалување на трошоците и приближување на таксите до оние во фламанските универзитети.

На вчерашните протести им се приклучија и наставници, како и претставници на организации од граѓанското општество.