Новинарството оваа година помина низ повеќе фази кои можеби не ги видовме или не беа толку изразени. За жал се уште новинарството во голема мера зависи од начинот на однесување на политичарите. Тие на некој начин диктираат наративи во современото новинарство, кои често можат да бидат и лажни. Во оваа година се соочивме со голем феномен на тој лажен популизам, наратив во новинарството предизвикан од глобални, но и од локални „мисии“ тука. Така што годината почна како што почна, беше затекнато од пандемијата. Наеднаш како новинари добивме силна општествена улога во ек на пандемија да покажеме одговорност. Добар дел од традиционалните медиуми ја изиграа таа улога прилично квалитетно во тој прв дел на пандемијата, за разлика од добар дел на онлајн медиуми, кои јас не би ги нарекол медиуми, кои го искористија тој потенцијал на лажни наративи за да шират несигурност, страв, влијанија. Тоа беа два антипода на новинарството кои што прилично добро ги видовме како функционираат во Македонија, изјави за Утрински брифинг новинарот и претседател на ЗНМ, Младен Чадиковски.

-Од друга страна мора да признаеме дека малку истражувавме. Само мал број на стории се појавија во првата половина на годината, смета Чадиковски и додава дека по летото кога се виде дека пандемијата не е баук и во неа може да се живее и работи, колегите се охрабрија да бараат подлабински стории и приказни кои не се дел од онаа официјална политика.

Околу слободата на медиумите во Македонија, Чадиковски вели дека цензурата во овој период е многу малку изразена, за разлика од минатиот период.

-Проблемот остана со финасирањето на медиумите што и понатаму не ги прави доволно слободни. Но ситуација каде што се јавуваат од кабинети и да уредуваат и диктираат вести, тоа време мислам дека помина, иако секогаш треба да бидеме будни во таа насока. Се на се, Македонија има напредок и прилично високи оценки, кои можат да бидат и поголеми, вели Чадиковски.

Во Утрински брифинг преку Зум платформата гостин беше и претставникот на Евротинк Александра Данаиловска, која истакна дека еден од клучните наоди во истражувањата е дека постои загрижувачка перцепција дека новинарската професија ја губи својата атративност.

-Како причина се наведени ниските плати и лошите работни услови. Позитивна тенденција е препознавањето на намалувањето на политичките влијанија врз новинарите од 2017 наваму. Тоа значи поголема лична, професионална слобода и поголема слобода на медиумите. Автоцензурата останува да биде евидентна и во пракса, но и во извештаите на ЕК. Прчината се гледа во неповолната економска состојба, недостаток на инвестиции во медиумите, надворешни притисоци, како и наплив на интернет портали без импресум, кои се најчестите „ширачи“ на лажни вести, вели Данаиловска.

Разговорот со Чадиковски и Данаиловска погледнете го во видеото: