Играчите на Верона успеаја да ги издржат бројните напади на „росоњерите“, го преживеаја и шутот од белата точка на Златан Ибрахимовиќ и на крајот ја испуштија победата.

Гостинските фудбалери по само 19. минути игра на „Сан Сиро“ имаа предност од 0:2. Прво Барак го отвори резултатот во шестата минута, а 13. минути подоцна Калабрија си постигна автогол.

Играчите на Милан брзо се созедоа од шокот и во 27. минута намалија на 1:2 благодарение на автоголот на Мањани. Во второто полувреме, Милан тргна во тотална офанзива, во 65. минута имаше одлична можност да израмни откако Френк Кеси изнуди пенал но Ибрахимовиќ ја шутна топката над пречката.

Десет минути подоцна Ибрахимовиќ постигна гол, но ВАР-технологијата го поништи бидејќи напаѓачот играше со рака. „Росоњерите“ продолжија со нападите и тоа им се исплати во последните моменти од натпреварот кога упорниот Ибрахимовиќ конечно се запиша во листата на стрелците.

И покрај ремито, по седум кола Милан остана лидер на табелата со 17. бода, два повеќе од изненадувањето Сасуоло, додека на делба на третото место се наоѓаат Наполи и Рома.