ВИДЕО: Милан или Интер, титулата во Серија А ќе се решава во последното коло
Вечерва Интер во претпоследното 37 коло мораше да оди на победа против Каљари за да остане во игра за Скудетото. По победата на најголемиот конкурент за титулата во Серија А, Милан, против Аталанта, играчите на Симоне Инзаги не смееја да си дозволат кикс.
„Нераѕурите“ триумфираа на гостувањето во Каљари со резултат 1:3 за вкупно 24 победа сезонава во најсилното италијанско првенство.
Во првото полувреме за гостите водство донесе Дармијан по асистенцијата Перишиќ во 25 минута од средбата. На стартот од вториот дел предноста ја зголеми Мартинез (51`), а само 120 секунди подоцна домаќините за момент ги вратија надежите преку Ликојанис во 53 минута..
Сите дилеми околу победникот ги реши Мартинез во 84 минута, а за Аргентинецот тоа беше 21 погодок во шампионатот. На табелата Милан води со 83 бодови, два повеќе од Интер на втората позиција.
Во своите последни натпревари, Милан на 22 мај ќе му гостува на Сасуоло, а истиот ден Интер ќе ја пречека Сампдорија.
Доколку двата тима на крајот имаат ист број бодови, Милан ќе биде прогласен за шампион бидејќи е подобар во меѓусебните дуели против градскиот ривал.