Вечерва во рамките од 33 коло во најсилното италијанско првенство составот на Лацио со убедливи 3:0 го совлада Милан.

На стадионот „Олимпико“ во Рим двоен стрелец беше Кореја во втората и 51 минута, а конечниот епилог го постави Имобиле во самиот финиш од средбата.

„Небесно-сините“ после овој успех се доближија на само пет бода заостанување од позициите кои водат во Лигата на шампионите, а до крајот на сезоната во Серија А ќе биде драматично и за „росонерите“.

На пет кола до крајот на шампионатот има три екипи со по 66 бодови (Наполи, Јувентус и Милан), додека Аталанта има два бода повеќе.

Од овој пораз на Милан голем профит да извлече Интер, кој доколку во сабота слави во Кротоне, а Аталанта не триумфира против Сасуоло, и официјално ќе ја обезбеди првата титула после 11 години.

Претходно во истата лигашка рунда се одигра уште еден меч, Наполи славеше кај Торино со 0:2, а за гостите од 85 минута како замена за Инсиње настапи македонскиот репрезентативец Елиф Елмас.

После тој триумф и „наполитанците“ остануваат во игра за едно од местата во ЛШ, односно се наоѓаат на третата позиција со 66 бодови, зад водечкиот Интер (79) и Аталанта како второпласирана која има 68.

Сезона 2020/2021
Серија А, 33 коло

Денеска, резултати –

Торино-Наполи 0:2
Лацио-Милан 3:0

Табела на пет кола до крајот на сезоната во Серија А –

(ЛШ) 1.Интер 79 бодови
(ЛШ) 2.Аталанта 68
(ЛШ) 3.Наполи 66
(ЛШ) 4.Јувентус 66
—
(ЛЕ) 5.Милан 66
(ЛЕ) 6.Лацио 61
—