Додека делегациите од САД и Русија се во Ријад, Саудиска Арабија, за да започнат денеска разговори за судбината на Украина, Илон Маск со својата функција додаде масло на огнот што го запали Доналд Трамп кога одлучи да ги исклучи и Киев и Европската Унија од разговорите.

Секретарот за ефикасност на американската влада и најбогатиот човек на светот, во објава на неговата социјална платформа Икс ја „промовира“ руската мисија во Саудиска Арабија.

Маск постави видео од рускиот министер за надворешни работи Сергеј Лавров и главниот помошник на Путин, Јуриј Ушаков како слегуваат од авионот на руската делегација и напиша: „Вака изгледа вистинското лидерство“.

This is what competent leadership looks like https://t.co/frZrdhsEzZ

— Elon Musk (@elonmusk) February 17, 2025

Пред разговорите за кои Стејт департментот рече дека имаат за цел да разговараат за крај на сега веќе тригодишната војна во Украина, американска делегација предводена од државниот секретар Марко Рубио се состана со саудискиот престолонаследник Мохамед бин Салман.

Лавров и Рубио разговарале телефонски во саботата, според Стејт департментот, по разговорот меѓу Путин и Трамп минатата недела.

Преговарачките тимови на Русија и САД ќе им ги пренесат резултатите од средбата на лидерите на двете земји, а потоа Трамп и Путин ќе донесат одлуки за следните чекори.

Се потсетува дека на 12 февруари претседателите на Русија и на САД остварија телефонски разговор, при што разговарале за можноста за прекин на непријателствата во Украина, билатералните односи и други прашања.

Тие, исто така, се согласија да одржуваат отворени канали за комуникација и да организираат приватен состанок.