Во последниот натпревар од второто коло на Премиер лигата, Ливерпул и Кристал Палас ремизираа 1:1 (0:1). Ваквиот исход секако е изненадување, бидејќи „црвените“ беа големи фаворити на домашен терен, но со оглед на развојот на настаните, Јирген Клоп би можел да се задоволи со ремито.

Патрик Виеира одлично ја постави тактиката на Кристал Палас, кој поведе од 32 минута. Тогаш Вилфрид Заха се најде во одлична шанса, која ја искористи со убав удар во долниот десен агол од голот на Алисон Бекер.

Ливерпул потоа напаѓаше за израмнување до кое успеа да дојде, но претходно остана со еден играч помалку поради црвениот картон на Дарвин Нуњез во 57 минута.

Уругваецот доби директно исклучување, а потоа уште повеќе им ја отежна ситуацијата на соиграчите.

Но, само четири минути подоцна Луис Диас одлично се снајде и погоди од работ на шеснаесетникот за 1:1.

Екипата на Јирген Клоп напаѓаше до самиот крај за пресврт, но Палас успеа да се одбрани и да си замине со голем бод од „Енфилд“.