ВИДЕО | Лазарова Трајковска: Законите оставаат простор за конфискација, но во пракса тоа е многу тешко изводливо
Проблемот е што Законот за кривичната постапка и Кривичниот законик оставаат простор за конфискација на имот стекнат со кривично дело, но во пракса тоа е многу тешко изводливо, вели за Утрински брифинг врховниот судија Мирјана Лазарова Трајковска.
-Добро е политичарите да се залагаат за борба против организиран криминал и корупција што се нотира и во извештаите на ЕК, и добро е тие да се сведуваат во пракса, вели таа.
Но, каде е проблемот во делот на македонските закони и практики? Кај нас само преку кривична постапка може да се покрене постапка за нелегално стекнат имот.
-Нашиот проблем е што Законот за кривична постапка и Кривичниот законик оставаат простор за проширена конфискација но во пракса многу тешко се спроведува. Пред десетина година имотот се префрлаше на роднини и блиски но со проширената конфискација ги опфаќа и овие случаи. Но обвинителот има ограничени ресурси, ја нема прво онаа поткрепа која што му ја дава законот, но впечатокот е дека и она што се има на располагање не се користи до крај. Обвинителот однапред треба да подготви цврст и силен предмет со што постапките би биле брзи и ефикасни, објаснува Лазарова Трајковска.
Таа сугерира дека поврзаноста со институциите ќе дава и треба да дава резултати.
-Законот вака како што е конципиран кај нас проширената конфискација ја поврзува со неколку кривични дела. Пораката на одземањето на бесправно стекнатиот имот е дека никој не треба да се офајди со криминално стекнатиот имот вели за УБ врховниот судија Мирјана Лазарова Трајковска.