ВИДЕО: „Кралевите“ славеа против Барса во евролигашкото Ел Класико
Кошаркарите на Реал Мадрид по едно продолжение ја надиграа Барселона со 91:88 (16:20, 16:19, 18:20, 23:14, 18:13) во рамките од 21 коло во Евролигата.
По три периоди се чинеше дека Каталонците ќе го забележат третиот последователен триумф против Реал, но потоа Серхио Љуљ се разбуди во четвртата четвртина. Го водеше својот тим кон враќање во натпреварот, со поени му се придружи Габриел Дек, а Реал успеа да поведе со три разлика на три минути до крајот.
Нокаутираната Барселона ја спаси Кори Хигинс со пет врзани поени, но Марио Хезоња и Љуљ го одведоа „Ел Класико“ во додатни пет минути. Во нив Џанан Муса се разбуди од никаде и едноставно доминираше на теренот.
Дек беше најефикасен во мадридскиот тим со 23 поени, Љуљ додаде 19, а Муса 18. За Барса Миротиќ беше подобар од останатите со 17 поени, а чешкиот тандем Јан Весели-Томаш Саторански постигна по 12. Реал сега оствари значајна победа во битката за првото место и моментално е на скор 14-7, додека Барселона е на учинок од 13 победи и осум порази на четвртото место.
Во останатите мечеви одиграни во четврток: Алба Берлин – Валенсија 88:94, Лион Вилвербан – Фенербахче 91:77, Монако – Олимпиа Милано 101:88 и Панатинаикос – Жалгирис Каунас 89:65.