Одбележувајќи го Светскиот ден на аудивизуелното наследство, 27 октомври, Кинотеката на Северна Македонија промовираше ново ДВД-издание со пет македонски долгометражни играни филмови дигитално реставрирани.

Се работи за два филма од хрватски режисери – „Три Ани” на Бранко Бауер од 1959 и „Македонски дел од пеколот” на Ватрослав Мимица од 1971 година, потоа „Жед” на Димитрие Османли од 1971, „Татко (Колнати сме, Ирина)” на Коле Ангеловски од 1973 година и „Хај-фај” на Владимир Блажевски од 1987 година. „Дигитализацијата на филмовите кои биле снимени на 35 милиметарска лента е проект со ограничено времетраење, бидејќи не се работи за неограничено количество на тие филмови.

Кинотеката во своите депоа чува околу 14 000 филмски копии и мислам дека сега и за во иднина е особено важно да се обрне внимание и на чувањето на релевантните документарни архивски материјали, кои не се нужно филмски, туку во овие денешни услови може да бидат и дел или продукција и на другите медиуми.

Така на пример, сега се поставува прашањето дали да се зачувуваат и материјалите што ги има на платформите како Јутјуб, се разбира ако тие се релевантни. Што се случува со архивите на електронските медиуми, телевизиите?

-Мислам дека ние сме слаби по ова прашање и дека во иднина треба да се обрне внимание на овој сегмент на зачувувањето на аудиовизуелни материјали и наследство- рече за „Утрински брифинг“, кој се емитува на „Слободна Тв“, Владимир Ангелов, директор на Кинотеката.

Целиот разговор проследете го во видеото: