Марк Винс, човекот кој стои зад популарната програма „Brave Wilderness“, на својот инстаграм-профил објави како ја убива озлогласената камен-риба, најотровната риба на светот.

Видеото кое во понеделникот стана популарно на Редит, на неупатените им објаснува дека камен-рибата создава длабоки рани кај жртвите користејќи сечилата кои се наоѓаат во нејзините пршлени, по што испушта смртоносен отров.

Винс во својата објава покажува и како изгледа отровот и предупреди дека камен-рибите не убиваат само во морињата, туку дека се опасни и за луѓето на плажите бидејќи можат долго да останат надвор од водата.

Како најотровна риба во светот и жител на Индопацифичкиот регион, камен-рибата претставува сериозна закана за невнимателните пливачи и нуркачи иако никогаш не напаѓа намерно.

Совршено е прилагодена за живот на морското дно. Нејзиното бодликаво тело е покриено со израстоци и алги, што ѝ овозможува совршено камуфлирање меѓу карпите и коралите.

Може да порасне до 40 сантиметри во должина и да тежи до два килограми, а на грбната перка има 13 отровни боцки кои содржат моќен невротоксин.

Може да се најде на длабочина до 30 метри на карпест терен или корални гребени. Интересно е што надвор од водата може да преживее и до 24 часа, што ја прави уште поопасна бидејќи луѓето случајно можат да ја згазат дури и на плажа, пишува во стручните написи.

Отровот од камен-рибата е еден од најсилните познати рибни отрови. Убодот може да предизвика:

– Екстремна болка
– Тешкотии со дишењето
– Парализа
– Шок
– Во екстремни случаи, дури и смрт

Во случај на убод се препорачува:

– Миење на раната со солена вода
– Потопување на повредениот дел во топла вода (45°C)
– Барање итна медицинска помош
– Примена на противотров во тешки случаи

И покрај тоа што е отровна, камен-рибата се смета за деликатес во некои делови на Азија. На пример, особено е ценета во јапонската кујна каде што се служи како сашими или во супа откако отровните жлезди внимателно се отстрануваат.

Се храни со помали риби и ракови, кои може да ги фати со неверојатна брзина, а главно е сама и е најактивна ноќе.