ВИДЕО: Јута е првиот полуфиналист во Западната конференција
Доцна синоќа во НБА лигата во првата рунда од плеј-офот на Западот составот на Јута со резултат 126:110 дојде до четвртата победа (4:1) и на тој начин го елиминираше Мемфис.
Кај победникот доминираше Мичел со 30 поени (10 асистенции), а за поразените по 27 поени запишаа Брукс и Морант (11 асистенции). „Џезерите“ се првите полуфиналист во Западната конференција и во следната фаза ќе играат со подобриот од дуелот Лос Анџелес клиперс – Далас маверикс.
А таму со 3:2 во серијата моментно водат Маверикси кои на „крилјата“ на Дончиќ во „Стејплс центар“ триумфираа со 100:105.
Словенецот има уште една одлична партија, забележа 42 поени, осум скокови и 14 асистенции, а кај домаќините „дабл-дабл“ учинок оствари Џорџ од 23 поени и 10 скокови.
Позната е и втората полуфинална двојка на Истокот, Филаделфија ќе ги одмери силите против екипата на Атланта. На домашен терен Филаделфија со 129:112 го совлада Вашингтон за 4:1 во серијата. Во триумфот на Сиксерси прв стрелец беше Сет Кари со 30 поени, а за Визардси два коша повеќе имаше Бил.
И Атланта со 4:1 го исфрли Њујорк, во „Медисон Сквер Гарден“ славеа Хокси со 89:103 предводени од Јанг со 36 поени и девет асистенции. За Никси најрасположен беше Рендл со 23 поени и 13 скокови.