ВИДЕО | Јовановски: Зелената енергија крие еколошки бомби во преработките на отпадите или црната металургија

Интервентниот план за инвестиции е среднорочен, шестгодишен. Тие 8 милијарди кои што ги најави премиерот Заев не се очекува да дојдат годинава, ниту наредната. Распределени се во периодот до 2026-27 година, така што има простор да се бараат извори на средства. Друго е прашањето какви се околностите во кои е сега Македонија и економијата во светот и каде ќе се најдат тие пари. Кога го зборам ова го имам предвид и јавниот долг, кој што веќе надмина 60% од БДП и кој што го стеснува значително просторот за натамошно задолжување. Ќе биде тешко да се обезбедат средствата особено што самиот план за инвестиции предвидува добар дел од средствата да се покријат од буџетски извори, дел од јавно-приватно партнерство, задолжување во странство… Ќе видиме како ќе се одвива целата постапка, какви ќе бидат капацитетите на домашните институции да го реализираат. Иако самиот план како план не е ништо ново. Нема некои поголеми изненадувања, Владата само убаво ги спакува сите проекти за кои до сега горе доле се зборуваше, изјави во Утрински брифинг Мирче Јовановски, новинар, економски аналитичар.

„Кога станува збор за приватизацијата на јавното земјиште многу е важно како ќе се спроведе. Мислам дека Владата има право кога кажува дека тоа е неискористен потенцијал, затоа што луѓето кои го обработуваат тоа земјиште сега немаат можност да се задолжуваат во банките и да го развиваат својот бизнис. Но поучени од злоупотребите во минатото, не сум сигурен дека тоа ќе биде целосно спроведено така како што е замислено. Во однос на производството на канабис, мора да признаам дека не сум доволно запознаен со проблематиката, иако знам дека производството на канабис во здравствени и медицински цели зема замав во светот, лежи голем потенцијал, но јас не разбирам што е проблемот, зошто Законот е заглавен во Собранието и што е проблемот“, вели Јовановски.

„Кога станува збор за можноста за задолжувања мора да ја имаме предвид и фискалната стратегија која што деновиве беше промовирана, каде што се предвидува јавниот долг да достигне и до 66%. Но фискалната стратегија има и еден дел каде што се говори за четири алтернативни сценарија, каде што работите нема да одат како што е во оптималното сценарио. Според тие сценарија и јавниот долг и буџетскиот дефицит како дел од БДП претрпуваат одредени измени. Така што треба да се биде претпазлив кога станува збор за планирањето на овие инвестициски проекти, имајќи го предвид капацитетот на домашните институции да ги спроведуваат тие проекти“, вели Јовановски.

Целата анализа погледнете ја во видеото:

Видео на денот