ВИДЕО: Ја заврши и романската авантура, што е следно за Бабунски?
Давид Бабунски (26) потврди дека ќе го напушти романскиот клуб Ботошани во чии редови сега остана само еден Македонец, Стефан Ашковски.
– Моето време во ФК Ботошани заврши. Тоа беше кратко, чудно, предизвикувачко и многу интересно искуство од кое извлеков многу вредни лекции за мојата кариера и живот. Јас сум многу благодарен на овој клуб што ми даде можност да се вратам во европскиот фудбал и на сите мои тренери, физичари, лекари, одговорните лица за дресовите и соиграчите – од кои неколкумина станаа одлични пријатели – за нивната поддршка и напорите да ги одржат работите заедно во текот на глобалната пандемија постојано менувајќи ја текстурата на нашите животи. Ви посакувам многу среќа во остатокот од сезоната – напиша Бабунски на „Инстаграм“.
Минатата сезона во првенството за Ботошани запиша седум настапи, а исто толку и во тековната 2020/2021. Пред да се пресели во Романија, ги бранеше боите на јапонските клубови Јокохама Ф. Маринос и Омија Ардија, во сезоната 2016-2017 настапуваше за Црвена звезда.
Во младинската кариера беше дел од школата на Барселона, а од 2013-2016 воглавно играше за Барселона Б.
Има девет настапи за нашата сениорска репрезентација, а со У21 успеа пред три години да игра на Европското првенство во Полска.
View this post on Instagram