Италија вчера се приближи до избор на првата жена претседател на земјата, по пет неуспешни дена во неколку круга гласање, што ги натера партиските лидери да бараат компромисно решение.

Политички извори велат дека веројатен кандидат е Елизабета Белони, дипломат од кариера која ги предводи тајните служби, како и министерката за правда Марта Картабија.

– Работиме на тоа да имаме паметна жена претседател, изјави лидерот на десничарската партија Лига, Матео Салвини пред новинарите по состанокот со лидерите на двете главни лево-центристички сили, Демократската партија и Движењето пет ѕвезди.

Лидерот на Движењето пет ѕвезди, Џузепе Конте, истакна дека и тој сака жена да го замени актуелниот претседател Серџо Матарела, чиј седум годишен мандат истекува следната недела.

– Многу се радувам што и другите политички сили, исто така, покажуваат дека сакаат да се постигне договор за жена кандидат од највисоко ниво, напиша Конте на Твитер.

Sono molto felice che anche le altre forze politiche mostrino di voler convergere su un profilo femminile di alto livello per eleggere la prima Presidente donna della nostra Repubblica. È sempre stato un nostro auspicio. #UnaDonnaPresidente pic.twitter.com/NNjnQKMCYp

— Giuseppe Conte (@GiuseppeConteIT) January 28, 2022

Во Италија, претседателот е влијателна фигура. Тој го назначува премиерот и често интервенира за да се решат политички кризи во третата по големина економија во еврозоната, каде владите преживуваат во просек една година.

За разлика од САД и Франција, каде што претседателот се избира директно, во Италија го избираат 1.009 парламентарци и претставници на регионалните власти со тајно гласање, кое политичките лидери често се обидуваат да го контролираат.