Фудбалерите на Италија го совладаа Велс со 1:0 во последното трето коло од групата „А“ на Европското првенство. Велшаните и покрај поразот како второпласирани се пласираа во осминафиналето на шампионатот.

Играчите предводени од селекторот Роберто Манчини со овој триумф и матетатички го обезбедија првото место, и воедно не знаат за примен гол после првите три натпревари, односно имаат гол разлика 7:0.

Италијанците со максималниот учинок од три победи покажаа и докажаа зошто се едни од главните фаворити за титулата на Евро 2020.

Во првото полувреме домаќинот на својот стадион во Рим беше подобар ривал, се закануваа Белоти и Киеза, но голот дојде од човекот од кој можеби најмалку се очекуваше.

Одличниот Матео Песина во 39 минута се најде на вистинското место и со еден прецизен удар ја затресе мрежата на Ворд.

Во вториот меч од групата Швајцарија со 3:1 триумфираше над Турција најмногу благодарение на двојниот стрелец Џердан Шаќири (26`, 68`). Претходно гол серијата ја започна Сеферовиќ уште во шестата минута, а феноменален гол за Турците во 62 минута реализираше Кахвечи.

Сега Швајцарците се на чекање, односно го чекаат расплетот во останатите групи и како една од четири најдобро третопласирани се најдат во нокаут фазата.

Евро 2020

Група „А“
3. коло, резултати –

Италија – Велс 1:0
Швајцарија – Турција 3:1

Конечна табела:

1.Италија 9 бодови (7:0)
2.Велс 4 (3:2)
3.Швајцарија 4 (4:5)
4.Турција 0 (1:8)