Во интервју за телевизијата Хепи, српскиот претседател Александар Вучиќ рече дека Косово нема право да аплицира за членство во меѓународни организации, бидејќи тоа е забрането со потпишаните договори.

„Тие немаат идеја, не ги читаат договорите што ги потпишуваат. Тие не смеат да аплицираат до меѓународни организации. Доколку се пријават, ќе имаат големи изненадувања“, рече Вучиќ.

Но, иако Вучиќ му се закани на Косово, тој сепак рече дека не сака војна и додаде дека сите треба да знаат какви се опасностите од замрзнат конфликт.

„Замрзнат конфликт значи дека се чека кој прв ќе извади меч. Не би сакал моите синови да одат во војна. Не смееме да дозволиме крв да влезе во нашите мозоци, мора да бидеме реални, луѓето мора да знаат кои се сите опасности од замрзнат конфликт. Албанците во основа не се подготвени за компромисно решение“, додаде Александар Вучиќ.