ВИДЕО | И медиумите ќе треба поодговорно да известуваат за насилството врз жените и семејното насилство
Предлог – законот за спречување и заштита од насилство врз жените и семејното насилство кој е во собраниска процедура содржи одредби кои би требало значително да го намалат овој вид насилство.
-Она што треба да се очекува од овој закон, кој требаше да биде донесен уште на крајот на 2019 година, е значително да се подобри институционалната грижа а и сеопфатната грижа за жртвите на родово базираното насилство. Она што е новитет во овој закон за разлика од претходно е воведувањето на нови дефиниции за овој вид насилство кои претходно не беа опфатени, како самиот термин родово базирано насилство, неконсензуално сексуално насилство, а предвидена е и поддршка на различни категории ранливи жени како жртвите на насилство поради сексуална ориентација и родов идентитет, Ромки, жени кориснички на дроги, рече за „Утрински брифинг“ на „Слободна ТВ“, Бојана Јовановска од Хелсиншкиот комитет за човекови права.
Значаен новитет е постапувањето на институциите со должно внимание, со оглед на тоа што најголемиот проблем е непријавувањето на жртвите, што кај нас изнесува само 2 отсто во однос на Европа каде изнесува 14 отсто. А една од причините за ниската стапка на пријавување е недовербата во институциите, односно недоволната сензибилизираност на службените лица што постапуваат во случај на насилство-истакна Бојана Јовановска од Хелсиншкиот комитет за човекови права.
Исто така, таа вели, дека жртвите на насилство ќе можат да покренуваат граѓански тужби за непостапување на институциите, а предлог законот предвидува да се води документација и евиденција што досега не беше случај.
Според Јовановска некои од медиумите сè уште не известуваат одговорно за родово базираното насилство, туку сензационалистички, а според новиот закон тие ќе ја имаат клучната улога во делот за превенција на овие појави, како и за елиминирањето на родовата нееднаквост и родовите стереотипи.
Целиот разговор со Јовановска проследете го во видеото.